Güei, por fin llega L'Anguleru al so pueblu natal, a L'Arena, con un carretáu de regalinos pa tola reciella. Y tuvimos la suerte de que ficiera escala esti vienres na escuelina d'El Rubín pa recoyer les cartes colos nuesos deseyos. Y como nun podía ser menos, nesta escuela de cuentu, aprovechamos la so visita pa presenta-y a Chuza, la curuxa, la nuesa mascota de la Biblioteca. Y Chuza enseñó-y la biblioteca y entrugó-y al Anguleru poles sos recomendaciones de cuentos pa esti Nadal. Y ésto foi lo que nos contó. Trescribimos equí'l testu orixinal:
"Siendo un home de mar, paso munches, munches, hores na soledá del mio chalanu. Son los llibros los que m'acompañen siempres. Amiguinos y amiguines, pa conoceme meyor nun dexéis de lleer la mio vida al traviés de "La hestoria de l'Anguleru". Pa presentavos a los mios amiguinos, "Fina la Parrochina" , "Nadarín" y "Don caballito de mar".
Y al traviés del mio turullu de mar, tamién sentí d'otres tradiciones asturianes, qu'anque nun seyan de mar, son de fai cuantayá. Un cuentu de recién :"Un nataliegu perbullindiegu", que rescata una pervieya tradición asturiana, que ye quemar un Nataliegu, un tueru de carbayu na nueche de Nadal.
¡Prestoses fiestes! y recordái:
pa viaxar lloñe, nun hai meyor nave qu'un llibru"
